Вілі

Вілі (стар.-сканд.: Vili) — адзін з першых Асаў, брат Одзіна і Вэ, разам з якімі ствараў зямлю.

Вілі
Пол	мужчынскі пол
Бацька	Бор
Маці	Бэстла
Браты і сёстры	Одзін і Вэ
У іншых культурах	Хёнір
Медыяфайлы на Вікісховішчы

«Нараджэнне»

Імір смокча карову Аўдумлу, якая знайшла родапачынальніка ўсіх багоў Бура.

Паводле скандынаўскай міфалогіі, калісьці, у часы, аб якіх не ведаюць ні людзі, ні багі, бо не было здольных запомніць, нарадзіўся волат Імір, а разам з ім з’явілася карова Аўдумла. Малака ў яе было ўдосталь, так, што хапіла нават Іміру. Але Аўдумле не было чым харчавацца, таму яна лізала салёныя камяні і да зыходу трэцяга дня вылізала новую істоту — Буры, што значыць Бацька — якая стала прабацькам усіх Асаў. У Буры з’явіўся сын, названы Бор, што значыць Народжаны. Бор узяў у жонкі дачку добрага волата, і ў іх з’явіліся дзеці — Одзін, Вілі і Вэ.

Стварэнне Зямлі

Мноства падзей адбывалася з багамі-братамі, аднойчы ім нават прыйшлося змагацца з Імірам, якога яны і перамаглі.

Браты кінулі цела Іміра ў самую глыбіню Сусветнай Бездані і зрабілі з яго Зямлю, а з крыві — возера, рэкі, моры. Косткі Іміра сталі гарамі, з аскепкаў касцей і зубоў выйшлі скалы і валуны — нездарма яны да гэтага часу тырчаць з вады, наровячы прапароць дно даверліваму караблю… З чэрапа Іміра багі пабудавалі небасхіл, а мозг кінулі ў паветра і зрабілі аблокі — вось чаму так падступны цёмныя хмары, якія пагражаюць то завеяй, то градам. Потым багі ўзялі зіхоткія іскры, што лёталі вакол, якія вырваліся з полымя Муспеля, і прымацавалі іх да неба. Так атрымаліся нерухомыя зоркі. Іншым іскрам багі дазволілі лётаць у паднябессе, але кожнай прызначылі месца і падрыхтавалі шлях. -- Марыя Сямёнава, «Дзевяць светаў»

Гэтак трыма братамі быў створаны свет Мідгард, але ён не быў населены.

Стварэнне людзей

Одзін, Вілі і Вэ забілі Іміра і стварылі з яго цела свет Мідгард.

Аднойчы браты ішлі па беразе створанага свету і ўбачылі два дрэвы. І задумаліся, што будзе, калі даць ім жыццё? Узялі браты дрэвы і выразалі з іх людзей. Одзін, старэйшы з братоў, даў ім душу і жыццё, Вілі — розум і рух, а Вэ надзяліў прыгожым абліччам, маўленнем, слыхам і зрокам. І далі мужчыну імя Аск, што значыць Ясень, а жанчыне імя Эмбла, што значыць Вярба. І пачаўся тады род людзей, які багі адгарадзілі ад астатніх светаў павекамі Іміра.

Наступныя згадкі Вілі

Пасля стварэння людзей пра братоў Одзіна, Вілі і Вэ не сустракалася згадак. Ва ўсякім разе, такіх не ўтрымлівае Эда ісландскага паэта і гісторыка XIII стагоддзя Сноры Стурлусана, якая з’яўляецца ледзь не адзінай крыніцай звестак аб германа-скандынаўскай міфалогіі.

Літаратура

• Эда. Песні пра багоў / уклад., пер. са старажытнаісл., камент. Яўгена Папакуля. — Мінск : Галіяфы, 2021.
• Эда. Песні пра герояў / уклад., пер. са старажытнаісл., камент. Яўгена Папакуля. — Мінск : Тэхналогія, 2022.
• Эда Сноры Стурлусана / уклад., пер. са старажытнаісл., камент. Яўгена Папакуля. — Мінск : Галіяфы, 2021.
• Эда. Забытыя песні / уклад., пер. са старажытнаісл., камент. Яўгена Папакуля. — Мінск : Тэхналогія, 2023.

Спасылкі

• Скандынаўская міфалогія (руск.)